Gen 14 | NdeIBE | STEP | Ngalesi isikhathi u-Amrafeli inkosi yaseShinari, lo-Ariyoki inkosi yase-Elasari, loKhedorilawome inkosi yase-Elami kanye loThidali inkosi yaseGoyimi

Genesis 14

U-Abhrama Uhlenga uLothi

1 Ngalesi isikhathi u-Amrafeli inkosi yaseShinari, lo-Ariyoki inkosi yase-Elasari, loKhedorilawome inkosi yase-Elami kanye loThidali inkosi yaseGoyimi 2 baya empini behlasela uBhera inkosi yaseSodoma, loBhirisha inkosi yase-Gomora, loShinabi inkosi yase-Adima, loShemebha inkosi yaseZebhoyimi lenkosi yaseBhela (kutsho iZowari). 3 Wonke amakhosi la angemuva ahlanganyela eSigodini saseSidimu (uLwandle lweTshwayi).

4 Okweminyaka elitshumi lanye ayebuswa nguKhedorilawome, kodwa ngomnyaka wetshumi lantathu amvukela.

5 Ngomnyaka wetshumi lane, uKhedorilawome lamakhosi ayemanyene laye baphuma bayanqoba amaRefa e-Ashitherothi Khanayimi, lamaZuzi eHamu, lama-Emi eShave Khiriyathayimi 6 lamaHori elizweni lamaqaqa laseSeyiri, kwaze kwayafika e-Eli Pharani eduze lenkangala. 7 Yikho basebephenduka baya e-Eni Mishiphathi (kutsho eKhadeshi), banqoba isigodi sonke sama-Amaleki kanye lama-Amori ayehlala eHazazoni Thamari.

8 Yikho inkosi yaseSodoma, lenkosi yaseGomora, lenkosi yase-Adima, lenkosi yaseZebhoyimi kanye lenkosi yaseBhela (kutsho iZowari) baphuma bayahlela izimpi zabo eSigodini saseSidimi 9 baqondana loKhedorilawome inkosi yase-Elami, loThidali inkosi yaseGoyimi, lo-Amrafeli inkosi yaseShinari kanye lo-Ariyoki inkosi yase-Elasu – amakhosi amane eqondene lamahlanu.

10 Ngalesi isikhathi iSigodi saseSidimi sasigcwele imigodi yengcino, yikho kwathi amakhosi aseSodoma leGomora, esebaleka, abanye abantu bawo bawela kuyo, abanengi babalekela ezintabeni. 11 Amakhosi la amane athumba zonke izimpahla zaseSodoma leGomora lokudla kwabo konke; asehamba.

12 Bathumba njalo loLothi umntanomfowabo ka-Abhrama lezimpahla zakhe, njengoba wayehlala eSodoma.

13 Omunye owayephunyukile wafika wazabikela u-Abhrama umHebheru. U-Abhrama wayehlala phansi kwezihlahla ezinkulu zikaMamure umAmori, umfowabo ka-Eshikholi lo-Aneri, bonke labo babebambene lo-Abhrama.

14 Kwathi u-Abhrama esizwa ukuthi isihlobo sakhe sasithunjiwe, wabutha amadoda ayengamakhulu amathathu letshumi laficamunye ababefundisiwe ekulweni, bezalwa endlini yakhe, wangena emzileni baze bayafika eDani. 15 Ebusuku u-Abhrama wehlukanisa abantu bakhe ukuthi babahlasele, wabatshaya waqothula, waxotshana labo waze wafika eHobha, enhla kweDamaseko.

16 Wabemuka zonke izimpahla wambuyisa lomhlobo wakhe uLothi kanye lemfuyo yakhe, ndawonye labesifazana labanye abantu.

17 U-Abhrama esebuyile ekwehluleni uKhedorilawome lalawomakhosi ayekanye laye, inkosi yaseSodoma yeza yazahlangana laye eSigodini saseShave (kutsho iSigodi seNkosi).

18 Kwathi uMelikhizedeki inkosi yaseSalema, waletha isinkwa lewayini. Wayengumphristi kaNkulunkulu oPhezukonke, 19 wabusisa u-Abhrama esithi, “Ubusisiwe u-Abhrama nguNkulunkulu oPhezukonke, uMdali wezulu lomhlaba.

20 Njalo kadunyiswe uNkulunkulu oPhezukonke, owanikela izitha zakho esandleni sakho.” Yikho u-Abhrama wasemupha ingxenye eyodwa yetshumi yakho konke.

21 Inkosi yaseSodoma yathi ku-Abhrama, “Ngipha abantu wena uzigcinele izimpahla.”

22 Kodwa u-Abhrama wathi enkosini yaseSodoma, “Sengiphakamisele isandla sami kuJehova, uNkulunkulu oPhezukonke, uMdali wezulu lomhlaba, ngenza isifungo 23 ukuthi kangisoze ngamukele lutho olungolwakho, loba kungaze kube ngumuca wohali loba ngumchilo wamanyathelo, ukuze lanini ungaze wathi, ‘UAbhrama wanothiswa yimi.’ 24 Angisoze ngamukele lutho ngaphandle kwalokho abantu bami asebekudlile lesabelo esingesalabobantu ababehamba lami – u-Aneri, lo-Eshikholi loMamure. Kabazuze isabelo sabo.”